Aramodo

عن الخبز و السيرك أحدثكم

Ahmed Moharram — Sun, 05 Dec 2010 07:08:53 +0000

Bread and Circuses

أولا و قبل ما أتكلم ولا كلمة أنا ماليش في السياسة , أنا راجل بتاع ويب ديزاين و ديجيتال ماركتنج

العنوان الغريب ده - لمن لا يعلم – هوه مصطلح سياسي إلى حد كبير و لكن خلليني أقولك الأول بسرعة و باختصار الكلام ده جه منين و معناه ايه

كان فيه شاعر روماني أيام العصر الروماني – طبعا – كان عايش في روما – – اسمه جوفينال هوه اللي وصف وضع الامبراطورية الرومانية ساعتها بالوصف ده

الراجل لقى السياسيين الرومانيين بتوع روما – سبحان الله – فقروا الشعب و أهملوا التعليم و الصحة و الكلام الفارغ ده و عشان يكسبوا أصواتهم في الانتخابات عملوا حاجتين

قبل ما أقول عملوا ايه أحب أؤكد اني باتكلم عن الإمبراطورية الرومانية و الله العظيم مش عن أي حد تاني يخطر على بالك – آه – العمر مش بعزقة

المهم الرومانيين ولاد اللذينة دول عملوا ايييه ؟

ادولهم عيش ببلاش و عملولهم في كل خرابة سيرك كبير

الناس طبعا اتبسطت و اتمزجت و بقوا آخر تمام و اتلهوا في الهلس ده و انتخبوا الناس الكبيرة اللي مكيفة الشعب

عشان كده الراجل جوفينال ده اتحسر على الناس أيام ماكانوا عارفين حقوقهم في المجتمع و كان عندهم همة عالية و بيمسكوا مناصب و قادة جيوش و أصبح كل اهتمامهم حاجتين

الخبز و السيرك

و توتة توتة و لسه لم تنتهي الحدوتة

زي ما قلت أنا مش راجل بتاع سياسة و مش هتكلم عن الأمر الواقع اللي كلنا شايفينه حاليا في كل مجتمعاتنا العربية للأسف

هسيبك انت تفكر و تحكم , سوري انت مالكش انك تحكم , انت ليك تفكر و تمصمص شفايفك و يمكن تحسبن

ده آخرك

انما أنا راجل بتاع ديجيتال ماركتنج زي ما قلت عشان كده أنا هعد في حالي في جمب كده و أبص على الانترنت من هذا المنظور الجوفينالي العبقري

نبص كده على الانترنت من حوالينا و نشوف الجمهور الانترنتي العظيم ملموم على ايه حاليا

الخبز و السيرك

لو جيت تقسم الجمهور بتاع الانترنت بيروح فين , هتلاقي قسم كبييييير جدا بيروح للسيرك المتمثل في اليوتيوب و الفيسبوك و تويتر و ماي سبيس و مواقع التورنتات و الأفلام – بأنواعها – و الجيمز و الأغاني و الفور سكواير و الفارم فيل و عد انت بقى براحتك

و قسم كبير برضه بس مش قوي بيروح للخبز المتمثل في شوية مواقع بتقدم حاجات خدمية ضرورية للناس فعلا زي حجز الطيران و المعاملات الحكومية و مواقع البيع و الشراء و شوية أخبار و حاجات تعملها دونلود فري و تتلهي على عينك فيها و خلصنا

حتى لو بصيت على الإعلامات أو الماركتنج اللي بيتعمل لأي حاجة حاليا بيركزوا على ايه في اعلاناتهم أو الفيتشرز بتاعت منتجاتهم؟

الخبز – كلمة مجانا , و صورة موديل حلوة

السيرك – كوميدي – حاجة غريبة زي عيل براسين مثلا – حاجة مخيفة – حاجة سهلة , أي انترتينمنت و السلام

و بكده اتلهينا في الخبز (بيزك نييدز) و السيرك (هلس) و ضيعنا جزء مهم جدا من الانترنت عشان ماحناش فاضيين له

اتفضل معايا حضرتك كده هاف أ لوك على الشكل الجميل ده اللي بيوضح الناس بتعمل ايه أونلاين و بيروحوا فين بناء على قائمة بأشهر و أكثر 100 موقع جذبا للزوار أونلاين

السورس هنا في اللنك الكويس ده

يا ترى نسبتهم كام اللي فعلا مهتمين بتطوير التكنولوجي و لا دورها في حياتنا و لا بيحاولوا ينتجوا حاجة و لا بيحاولوا يفيدوا الناس بحاجة و لا فين الأفكار الجديدة و لا الفكر الإيجابي و لا أي حاجة

أنا عارف ان فيه ناس كتير مهتمة بس ده من وجهة نظر اللي واخدين الانترنت شغلتهم زي حالاتي كده , كل اللي انت شايفهم ناس جييييكس و بروفيشنالز انما على أرض الواقع الناس دي نسبتها قليلة جدا و حتى دول في منهم كتير قوي الموضوع بالنسبالهم مجرد شو أوف , أو استعراض و خلاص

لازم تخش السيرك و تتويييت عشان تبقى “كول” و إلا هيبان انك مش متابع و مش اب تو دايت

ما أنكرش اني كنت ضحية لفكرة الخبز و السيرك لفترة طويلة و يمكن دي من الحجاجات اللي اكتشفتها امبارح برضه و أنا بحتفل ب 10 سنين أونلاين

في النهاية عاوز أسأل سؤال

هل مستخدمي الانترنت فعلا بهذا المستوى من الجهل؟ ولا هي أصلا الانترنت بالنسبة لكتير من الناس وسيلة ترفيهية و تضييع وقت و خلاص زي التليفزيون مثلا؟

10 سنين من الانترنت و أسئلة بلا جواب

Ahmed Moharram — Sat, 04 Dec 2010 12:35:50 +0000

happy 10 years !!

ممكن نعتبر الكلام النهاردة هو نوع من التفكير بصوت عالي أو إعادة ترتيب الأوراق أو نقطة نظام أو أي حاجة تحب حضرتك تسميها

المهم اسمحلي كده آخد رست 5 دقايق كده و أفكر شوية

أيوة يا سيدي عاوز افكر , ما هو أنا اكتشفت مؤخرا ان نسبة التفكير الفعلي في حياتي سواء في البيت أو في الشغل نسبة محدودة جدا

الواحد كل ما بيكبر كل ما بيركن على خبرته أكتر تحس ان كل تصرفاته ما هي إلا لووووب من التصرفات اللي معظمها بيتم من غير تفكير

روتين يومي جوه روتين شهري جوه روتين سنوي جوه بالونة كبيرة أوي اسمها …

حياتك

انهاردة زي ما قلت عاوز أفكر معاكم في جزء صغير قوي من حياتي , و هو حياتي الانترنتية

مش هحكي من أول ما قعدت على كميوتر متوصل بالنت سنة 1998 عشان دي كانت فترة متقطعة , أول مرة يكون عندي انترنت كونكشن في البيت كان في سنة أولى جامعة يعني بداية سنة 2001

يعني مع نهاية 2010 هيكون عمري الانترنتي عشر سنين , و دي أول فكرة صدمتني الحقيقة

عشر سنين بس؟ ده أنا تقريبا ذكريات ما قبل الكومبيوتر بدأت تتلاشى من عندي !! ده أنا حاسس اني مولود و في ايدي الماوس ..

و من هنا اكتشفت اني فعلا في خلال العشر سنين دول ممكن أقول ان الانترنت أخدت ما لا يقل عن 40 % من وقتي

و على فكرة أنا بتكلم عن الانترنت مش الكومبيوتر عموما , يعني أنا مش بتكلم عن فترة الفيفا و الجيمز و الحاجات دي

أنا فعلا مش فاكر امتي في خلال العشر سنين دول عدى عليا يوم من غير انترنت أو كمبيوتر على الأقل

حتى في أيام الأجازات و هي أصلا قليلة جدا لازم انترنت

طيب يا ترى ايه تأثير الفترة الطويلة دي على شخصيتي؟ هل فعلا العشر سنين دول ضاع مني جزء كبير أوي منهم بسبب الانترنت؟ هل فعلا الانترنت أصبحت شيء لا غنى عنه زي الأكل و الشرب؟ هل الانترنت غيرت من بعض سلوكياتي و طريقة تعاملي مع الناس؟هل أنا بتحول زي بعض الناس إلى كائن كمبيوتري و بفقد الكثير من الصفات الانسانية بالتدريج؟

ما هو لما تكون بتعرف أخبار قرايبك و أصحابك من حاجة زي الفيسبوك , يبقى أكيد في حاجة غلط . و لما المناسبات الاجتماعية تتحول كلها لايميلات أو صور على الفيسبوك أو أونلاين ايفينتس يبقى أكيد الجنس البشري فيه حاجة غلط بتحصله

هل أحمد محرم البني آدم هو نفس شخصية أحمد محرم الأونلاين؟ و لا انت بتستخبى ورا الانترنت و بتشتغلني؟ هل انت فعلا بنفس الشجاعة و الظرافة و الأمانة و المثالية اللي بتحاول توهمنا بيها؟

طب يا ترى فيى العشر سنين دول كتبت كام مشاركة فورمز و بلوجز و تويتات رايحة و تويتات جاية و فايسبوك و ايميلات و هم ما يتلم؟ تفتكر لو جيت تغربل كل مساهماتك العظيمة دي لحاجة مفيدة, تفتكر تطلع بكام كلمة منهم؟

طيب على مستوى الشغل , هل فعلا مستواي العلمي و الفكري هو مستوى واحد في سني و خبرتي بس من دول العالم الأولاني؟ و لا أنا كنت بهيس في العشر سنين دول و معلوماتي معظمها معلومات سطحية؟

طيب هل أنا فعلا متمكن من شغلي؟ طيب هل كمية الحاجات الجديدة اللي بتعلمها كل فترة متناسبة مع كمية الوقت اللي بقضيه أونلاين؟

هوه أنا فعلا ماقدرش أبقى أحسن من كده؟

هل يا ترى لو رجع بيا الزمن 10 سنين لورا , كنت هستعمل الانترنت بنفس الطريقة؟

يا ترى ال 10 سنين دول أنا الكسبان فيهم (حسنات) ولا العياذ بالله خسران (سيئات) ؟

طبعا مش هجاوب و مش عاوز حد يجاوب

كل واحد عارف نفسه كويس

زي ما قلت هي نقطة نظام

ربنا يصلح الحال

…

ويكي ليكس و جول و جول و جول

Ahmed Moharram — Mon, 25 Oct 2010 11:04:07 +0000

ويكي ليكس يا مزبطهم

اليومين دول طبعا اللي ما يسمعش عن ويكي ليكس يستحسن يروح يكشف على ودانه لأن أكيد عنده مشكله

ويكي ليكس هو بورتال جديد بنفس أسلوب الويكيز المعروف اللي بيعنمد على المعلومات الموسوعية الي اليوزرز بيحطوها بنفسهم و يربطوها ببعض , بس طبعا لأن ويكي ليكس له طبيعة خاصة جدا للمعلومات اللي بينشرها و هي معلومات و وثائق سياسية و عسكرية قد تبلغ درجة عالية جدا من السرية لازم يكزن عنده متطوعين و صحفيين يوافقوا على نشر المعلومات دي قبل ما تتنشر

صدق أو لا تصدق , الباشمهندس جوليان أسانج, الفوندر بتاع ويكي ليكس بيقول انه بيعتمد على مساهمات زوار البورتال في تجميع الوثائث السرية دي و بعدين التيم بتاعه من المتطوعين و الصحفيين بيراجعوها و بعدين تتنشر

عشان ما أطولش أكتر من كده في هاتش معظم الناس عارفاه

ايه علاقة اللي بيحصل ده بالويب و النيو ميديا؟

زمان اتكلمنا عن النيو ميديا و الفرق بينها و بين الميديا التقليدية

اللي بيحصل بكل بساطة ان الموضوع حاليا أصبح ماتش جامد جدا بين وسائل الاعلام الجديد زي الويكيز و السوشيال نيتوركس و السوشيال بوكماركنج و البلوجز و الميكرو بلوجنج توولز

الفريق ده على شمالك بالألوان المبهرجة الصاخبة المدندشة

و الناحية التانية الفريق بتاع الميديا التقليدية زي شبكات الأخبار و الجرايد و الإذاعات الرسمية و الكلام ده و الفريق ده طبعا لابس أبيض في اسود و حالته كرب

السي إن إن على ايدك اليمين و الويكي ليكس على ايدك الشمال

الماتش النهارده بين الفريق الأول و يمثله الكابتن أسانج أبو تريكة كابتن نادي ويكي ليكس الصاعد هذا الموسم إلى دوري الأضواء و الشهرة

في مقابل الولية أتيكا شوبرت (فيها شبه من شيكابالا) باك يمين نادي السي إن إن , بطل كاس العالم 20 مرة قبل كده ورا بعض

بص شوف الويكي ليكس بيعمل ايه

الوليه المسحوبة من لسانها الزالف دي بتقوله مش انت متهم في قضية اغتصاب الراجل يقولها يا وليه مال الانترفيو و الموضوع ده احنا هنا بنتكلم عن مئات الآلاف من ضحايا الحرب اللي قتلتوهم يا ولاد الذين كفروا و مطلعين عرايس الماريونيت في وسائل الاعلام بتاعتكوا يقولوا أعداد أقل بكتير جدا من الواقع اللي فضحتكوا بيه عيانا بيانا

تقوم برضوا الغبية تقولوا بس انت ايه رأيك في ان التهمة الموجهة اليك دي ماتأسرش على مصداقية المنظمة بتاعتك يقوللها لو غيرتي الموضوع تاني هسيبلك الزفت ده و أمشي تقوم هي برضه زي الغبية مصرة تستفز في أم الراجل راح راميلها المايك و فرطها و مشي

بغض النظر الراجل ده مدان و لا بريء في موضوع الاغتصاب ده و لا البنتاجون اللي مزبطه زي ما الراجل بيقول

أنا اللي ليه دلوقتي ان الراجل ده فضحهم و فضح وسائل الاعلام المرتشية بالوثائق و فضح كذبهم على العالم كله و خلى منظر البنتاجون و المخابرات الأمريكية زبالة و لا أكنهم شركة جيل للملابس الداخلية

اللي ليه دلوقتي ان تصرف الراجل ده بيثبت ان مش كل حاجه تقولوا أبواق الميديا المسلطة على رقابنا دي تبقى هي الحقيقة و إذا كنتوا انتوا سي إن إن أنا الويكي ليكس و بقيتوا انتوا اللي دلوقتي بتنقوا مني الأخبار يا كلاب

كان هذا موجز الأنباء و بكرة نعد جمب الويكي ليكس و نسمع الزيطة و الفضائح أكتر و أكتر إن شاء الله

حقا , إنــه عـــــــــــــــــالم واحـــــــــــــد

Ahmed Moharram — Mon, 27 Sep 2010 09:45:54 +0000

أفتكر زمان و أنا صغير (أنا لسه صغير على فكرة) كان فيه برنامج بيجي على القناة التانية كان اسمه إنه عالم واحد , أو يمكن اسم البرنامج كان مختلف بس الست اللي كانت بتقدم البرنامج كانت دايما تختم بالجملة دي

أفتكر البرنامج كان قصير جدا حوالي 3 دقائق بيعرضوا فيلم عن البيئة و الست الحاجة دي كانت بتقرأ التعليق بصوتها و تروح خاتمه الكلام بطريقة مسرحية كده

إنه عالم واحد …

الجملة دي رنت في دماغي كده انهارده و أنا آعد مبرأ أدام الشاشة

مرة واحدة كده افتكرت اني مصري شغال في السعودية بكلم واحد صاحبي سوداني شغال في الإمارات في الشركة اللبنانية اللي مديرها انجليزي اللي كنت شغال فيها و بسأله عن مديرنا الكندي اللي ساب أبوظبي و راح أمريكا

يا ســـلااااااام

مرة واحدة لقيت صوت الباشمهندسة دي بيرن في دماغي , حقا .. إنه عالم واحد

بس العالم اللي بتكلم عنه انهارده هو جزء من العالم اللي السيدة الفاضلة دي كانت بتتكلم عنه

عالم الإنترنت

و بعدين الجملة دي خلتني أفكر في حاجة ليها علاقة بشغلي

الناس اللي عاوزه تعمل ويبسايت عالمي يعني عاوز يتارجت يوزرز في أمريكا و أوروبا و الصين الشعبية و حلمية الزيتون و باب الشعرية , ايه الحاجات اللي لازم ياخدها في اعتباره و هو بيعمل السايت؟

هل لما أعمل ويبسايت فيه عربي و انجليزي و فرنساوي أبقى أنا كده تمام و لا ده بس مجرد خطوة واحدة من مشوار طويل؟

من وجهة نظري المتواضعة فيه حاجات أكتر بكتير لازم الشخص المسؤل عن الويبسايت ياخد باله منها , زي :

1- بلاش الترجمة الحرفية للكونتنت بتاعك , مش كل الكلام العربي هيتحول انجليزي بنفس القوة و المضمون , لما تكون عاوز تعمل كونتنت انجليزي لويبسايت عربي , هات كونتنت رايتر ماتجيبش ترانسلاتور

أسخف مثال ممكن تشوفه لكده , شوف مواقع الموبايلات زي نوكيا مثلا , بس النسخة بتاعة السعودية

http://www.nokia.com.sa/find-products/all-phones/nokia-n8-2

السلوجان بتاع البرودكت : ما الذي يمكنك أن تفعل به ؟

بالله عليكم فيه حد بتاع ماركتنج عربي هيختار سلوجان زي ده؟

ربما يمكنك أن تقلي به البطاطس

ايه الهزل ده؟

طبعا السلوجان قد يكون مقبول بالانجليزي

What Will you do with it?

2- لازم تخللي السايت بتاعك من برة انتناشيونال بس أول ما اليوزر يدخل على اللوكال سايت بتاعه لازم اليوزر يحس ان مفيش نسخة تانية من السايت

يعني كل حاجة تبقى لوكالايزد حتي الصور , لو انت حاطط في السايت العربي صورة بتاعت ناس عرب أو خليجيين لازم تقلبها في السايت الانجليش و تحط ناس أجانب (بس ابعد عن الحريم طبعا)

3- نيجي لموضوع اليوزر اكسبيرينس و أقصد بيها النافيجيشن , اليوز أكشنز , الفورمز و الفاليديشن , فلاش و لا جافا سكريبت , حاجات كتير قوي لما تيجي تفكر فيها هتلاقي ان في أجزاء من عالم الانترنت بتستعمل طريقة ما و أجزاء أخرى عايشة في عالم تاني

يعني مثلا أنا أزعم اني أقدر أفرق بين سايت أمريكي و سايت أوروبي رغم ان الاتنين انجليزي و الاتنين قد يكونو بيتكلموا في الويب ديزاين مثلا بس فعلا كل ثقافة و ليها الاحساس اللي بينعكس على الويبسايت بتاعها

طيب إزاي تقدر تعمل ويبسايت يناسب الثقافات المختلفة للناس دي

الإجابة ببساطة هي البساطة . ما دمت عاوز تعمل ويبسايت انترناشيونال يبقى لازم تستعمل الكومن سنس ديزاين

ألوان و جرافيكس بسيطة و غالبا الأبيض و الجراي , تكست تايب واضح عربي و انجليزي , نافيجيشن سهلة بدون تعقيد و ينفع تتقلب رايت تو ليفت بسهولة عشان ما يطلع عين الديزاينر

كله دلوقتي بيعرف فيس بوك و تويتر و يوتيوب , لو السايت بتاعك قرب من نفس الاستايل بتاعهم اليوزر مش هيحس انه في مكان غريب بس برضه لازم تحاظ على الهوية بتاعة السايت بتاعك

يعني لازم تعمل بالانس كويس ما بين اليوزابيليتي و اليونيكنس

Usability Vs. Uniqueness

أظن في حاجات تانية كتير ممكن نقولها لو قعدنا نفكر شوية بس الحاجة بتاعة العالم الواحد بتقوللي ياللا يا عم الحاج عشان عندك شغل

يا ريت اللي عنده حاجه يحب يضيفها , فيه كومنت بوكس يتيم تحت أهوه

شكرا و سلام عليكم

مبعثرات متفرقات متشنكلات بالمكسرات

Ahmed Moharram — Mon, 13 Sep 2010 12:23:37 +0000

معلش شوية حاجات ملهاش علاقة ببعض عشان بقالي كتير ما جتش هنا ..

فاصل و نواصل

(1)

رمضان .. و بعدين العيد .. و كل سنة و انتم طيبين و انتوا بالصحة و السلامة و انتوا عاملين ايه … رغي .. مجاملات .. حلويات

(2)

عيد الفطر اللي فات قررت اني ما أبعتش أي رسائل اس ام اس لأي حد تهنئة بالعيد رغم اني وصلني يجي 30 مسج ساعتها و اكتفيت اني أتصل بس بالناس اللي فعلا تستاهل أكلمها ..

و السنة دي قلت ما بدهاش بقي , فتحت الفون بوك و اديتها اس ام اس لبتاع أربعين واحد نصهم ما كلمتهمش من يجي سنتين بس أهو لزوم المجاملات بقي

و مع ذلك

محستش اني عيدت على أي حد إلا لما كلمت أمي في التليفون بس

نصيحة لوجه الله سيبك من الاس ام اس الباردة اللي بتبعتها كل عيد و موقع تحتيها باسمك و تروح عامل سيليكت لخمسين واحد و سيند و دمتم

العيد فرحة .. و الاس ام اس باردة …

جدا ..

(3)

لما تلاقي اللي قدامك بدأ يشتم و يهلوس و يقل أدبه تعرف انه خلاص

مش قادر يقابل الحجة بالحجة , خلاص النار اللي جوه قلبه و الحقد اللي ماليه من اللي بيشوفه من انتشار الإسلام لازم يطلعها

احرقه يا كلب , احرقه و اظهر للعالم كله الحقد و الغل اللي في قلوبكم

أحرق الله .. ولا بلاش

خلينا محترمين للآخر

…

(4)

أنا عارف ..

طلعت عيل و رجعت في كلامي ..

بس و الله أنا أكتفت الفيس بوك مرة تانية بس عشان خاطر بعض الناس العزيزة عليه مش عارف أتابع أخبارهم الا من خلال المحروق ده

ربنا يستر ..

(5)

جوجل شغلت الانستانت سيرش

مبروك يا ولاد

انجاز تاريخي , يلا ماحدش يدوس انتر بعد كده

ايه يا كابتن جوجل ؟ تمخض الجبل و لا ايه؟

أنا عاوز لايف سيرش ريسلتز بقى , سيبك من الهاتش ده

(6)

فيس بوك هيشغل الجيولوكيشن ساين ان زي فور سكواير , يعني بعد كده هيبقي محرم عامل ساين ان من كوالا لامبور و مش عارف مين اللي عامل ساين ان من القطب الشمالي و شوية جيمز تافهة و شوية ألقاب غبية و شوية بادجز معوقة و هيييييييييييييييييصة

و بيع اعلانات و برايفاسي يا لطفي ..

و عجبي ..

(7)

للأسف بقالي فترة في مود أجازة مش عارف أطلع منه

بعد الدقايق عشان يوم الشغل يخلص

كما يقول الفرنجة

creative burnt out

للأسف كل الحالات اللي دخلت فيها قبل كده انتهت بإني غيرت الشغل

أتمنى إن ده ما يحصلش , على الأقل على المدى القريب عشان خاطر الناس المحترمة اللي شغال معاهم

(8)

كالعادة في فكرة مشروع تجمعي ثوري حزمبلي مع الأصدقاء اللدودين عشان نعمل الشركة العالمية الكونية اللامحلية الخزعبلية اللي هتغير مستقبل الانترنت للـــ

أحسن ..

أممممممما نشوف ..

(9)

من النهاردة و طالع لو واحد صحبك في السعودية بيسألك على بروكسي بلاش تسيء الظن بيه

أصله ممكن يكون عاوز يدور على فــــــــ

مش فـــيلم

لأ ..

فــــــــــتـــــــــــــــوى

صحيح هم يضحك و هم …

يضحك أكتر

(10)

حكمة العدد ..

مفيش أكل من غير ملح ..

ومفيش ويبسايت من غير ويب أناليتيكس ..

مع السلام عليكم و نشوفكم بخير

لو انتوا فاضيين , أنا مش فااااااضي

Ahmed Moharram — Sat, 05 Jun 2010 06:51:56 +0000

رغم ان من وجهة نظري المتواضعة موقع أخبار العربية مفيش فرق كبير بينه و بين المراحيض العمومية و المفروض يحطوا في البانر بتاع السايت اللهم إني أعوذ بك من الخبث و الخبائث إلا إني أعترف انه لازم أشوف الأخبار عندهم مرة واحدة على الأقل في اليوم

النهاردة استفزني جدا خبر ظريف مش هحط اللنك بتاعه عندا فيهم بيقوللك يا سيدي ان ميزانية مسلسلات رمضان المصرية فقط حوال نصف مليار جنيه

يعني خمسيت مليون جنيه

يعني خمسميت ألف ألف جنيه

ايه الهزل ده؟ المشكلة من وجهة نظري مش في الفلوس

ما احنا ياما ضيعنا فلوس على حاجات أهيف من كده

المشكلة ان الناس فعلا بتتفرج على الحاجات دي

لأ و ايه كمان في رمضان

طبعا الموضوع مش جديد ما هو كل سنة فوازير و مسلسلات احتفالا بشهر رمضان و برضه كل سنة الناس بتكتب و الشيوخ بتقول في خطب الجمعة و الدروس يا جماعة ما ينفعش الكلام ده

ماشي

بس اللي يغيط ان شياطين الانس بيبدأوا كل سنة بدري عن السنة اللي قبلها يعني اعلانات المسلسلات شغالة بقالها أكتر من شهر و الله أعلم

و لسه كمان قول شهرين على رمضان

ما شاء الله, افتكرت دلوقتي ان الصحابة و التابعين رضى الله عنهم كانوا يدعون الله أن يبلغهم رمضان ستة أشهر و يدعون الله في الستة الأخري أن يتقبل منهم

دلوقتي احنا بنقعد نصور المسلسل ثلاث شهور و نعمل اعلانات ثلاث شهر و نعرض المسلسل في شهر أو يزيد و بقية السنة نقعد نتناقش في أحداث المسلسل

شيء هااااااااااااااااااااااايل بصراحة

ما أنكرش اني بضيع وقت كتير في حياتي و ربنا يتوب عليا و مش عاوز حد يفهم معني كلامي اني عامل أوبتيميزيشن لحياتي و لكن كل رمضان ما يهل علينا بيبقى عندي أمل فنها تكون بداية لتغير جذري للأحسن

عشان كده أنا عاوز أعمل حاجة الناس بيسموها حملة عشان نحاول من دلوقتي نقاول الهجمة الشرسة اللي جاية علينا في رمضان من ناس مسلمين زيينا و بيتكلموا عربي زيينا مش من أمريكا و لا اسرائيل

هجمة هتضيع مننا أهم 30 يوم في السنة و الله أعلم هتعيشهم السنة الجاية و لا لأ

علشان كده أنا عاوز أعمل هجمة مرتدة

و إن شاء الله هنكسب

ربنا يجعلنا من الفائزين برمضان

قال صلى الله عليه و سلم في ما معنى الحديث

رغم أنف امرىء أدرك رمضان و لم يغفر له

قبل ما أنسي أحب أشكر حبيبي عمرو بدوي اللي نبهني للموضوع ده من فترة , جزاه الله كل خير

و سلامو عليكوااا

ألا أيها الفوتوشوب , ما هو لون الحزن؟

Ahmed Moharram — Tue, 01 Jun 2010 08:08:00 +0000

الفوتوشوب هو بلا شك – من وجهة نظري الشخصية البحنة – أحسن اختراع بعد الميه السقعة

الفوتوشوب - برضه زي الاعتراضية اللي فوق – هو سيد و تاج راس الكومبيوتر سوفتوير من ساعة ما قالوا بخمسة جنيه يا سوفتوير

الفوتوشوب - خلاص بقى – هو روح الديجيتال لايف اللي احنا عايشينها

اليومين دول بما اني بمر بحالة نفسية زي الفل و لله الحمد و المعنى في كرش الشاعر أكيد

زي ما كان الشعراء بتوع زمان بيتخيلوا ناس أو بيخاطبوا الناقة في أشعارهم

أحب أتكلم شوية مع الفوتوشوب و على فكرة الفوتوشوب بتاعي أصلي بتاع بلاده من مزارع أدوبي رأسا إلى ماي ديسكتوب

يعنى لا سيريال و لا كيجن و لا حركات تانية جامعة دي

المهم ندخل في الحوار

يا كابتن فوتوشوب بما انك راجل جامد آخر تلات حاجات و عندك توول بوكس ما شاء الله أطول من عواميد النور

هعمللك تست صغنن قد كده, أنا عارف ان عندك تول بتجيب الكلر فاليو من أي صورة , بس يا تري عندك توول تطلع الاحساس من الصورة؟

يعني خد عنك على سبيل المثال , اعتبر ان دي صورة قلبي

تقدر تقوللي أنا حاسس بإيه؟

قام الحج فوتوشوب ضحك ضحكة خبيثة كده من المينيو بتاعة الهيلب و قاللي يابني بص على الفيرجن أنا مش فوتوشوب عادي

اتفرج يا سيدي على الحركة دي

يابن الايه يا فوتوشوب , بصراحة كبستني

عرفت منين اني حزين؟

بس الكلر الكود اللي انت مطلعه ده مش عارف أجيب اللون منه؟

جربت أحط الكلر كود ده في الباكجروند بتاعت الهوم بيج بتاعت حياتي بس مش عارف , مفيش لون بالفاليو دي

ده لونه ايه؟

حد يا جماعة يعرف لون الحزن ايه؟

أسود ؟

لأ مش اسود بالعكس ده الاسود ده لون ملكي حاجة كده راقية جدا

طبعا الديزاينرز يعرفوا كويس ان كل لون و له دلالة معينة , يعني لما تكون عاوز تعمل سايت أطفال في درجات ألوان معينة تستعملها , سايت أخبار في ألوان معينة , سايت حريمي أكيد هيبقي غرقان قلوب و دباديب و لون بمبى مسخسخ

انما لو عاوز تعمل سايت حزين؟ هيبقي لونه ايه؟

على فكرة الحزن غير الاكتئاب , الحزن ده لما بسمع الكلمة على طول بييجي في خيالي صورة شمعة بتتطفي بشويش قوي و وببطىء و خيط دخان رفيع قوي رمادي في وسط الضلمة بيلف حوالين نفسه أكنه بيدور على فرحة بس مش لاقي

بالمناسبة برضه الشعور بالحزن ده مش وحش أوي على فكرة , و بقول مرة تانية الشعور بالحزن غير الشعور بالاكتئاب

و ياريت محدش يقوللي حزين ليه

عشان ممكن أرص بدل السبب مليون , منها أسباب شخصية و نفسية و خارجية و دولية و اسلامية و تكنولوجية

بس ده مش مكانها

أنا بس عاوز أعرف

لون الحزن ايه؟

حد يعرف؟

تهـيـيــــس ويب ديزاينر

Ahmed Moharram — Sun, 09 May 2010 07:06:58 +0000

1 – تهييس في الأسانسير

الأسانسير بتاع العمارة اللي ساكن فيها مش يوزابل
أقوللك ليه
نازل الصبح رايح الشغل
طبعا مش محتاج أقول اني بروح الشغل و أنا نايم عشان الشغل الساعة 7 الصبح
المهم دخلت الأسانسير و عاوز أنزل
طبعا أنا بذكائي المعتاد قاعد أدوس على 2 اللي هو أصلا الدور اللي أنا فيه حاليا

أدوس 2 و مفيش حاجة بتحصل
يادي النيلة الأسانسير عطلان و لا ايه
الحمد لله فقت من الغيبوبة و افتكرت اني نازل مش طالع و نزلت الحمد لله
قلت لنفسي طب ما الأسانسير برضو كان ممكن يبقي محترم معايا و يقوللي اصحي يا مغفل
لأ بجد المفروض أصلا أول ما دخلت الأسانسير رقم 2 اللي هو الدور اللي أنا فيه يكون منور و بعدين أنا بضغط على رقم 2 مفيش أي ريسبونس
ممكن يطلع صوت مثلا أو ينور بلون تاني عشان آخد بالي
أي حاجه يعني مايسيبنيش نايم كده

2 – تهييس في العربية

استكمالا للتهييس على الصبح ركبت العربية و أنا بقفل الباب اتقفل مني جامد كده قلت لنفسي يا سلام يا واد لو ينفع العربية يبقى فيها جي كويري أو موو توولز و الباب نحط عليه اييزنج ايفيكت كده يقفل بشويش

3 – تهييس في الإشارة

بعد كده وقفت في إشارة
قلت طب ليه الإشارة جمب الألوان كده يعملوا حاجة زي البريد كرم و يقولك اسم الإشارة اللي قبلك و اللي بعدك و لو الإشارة اللي بعدك مقفولة يطلع الاسم باللون الأحمر و لو مفتوحة تبقي أخضر , على فكرة و أنا بكتب برضه افتكرت حاجة ظريفة بيعملوها في دبي لو في حارة معينة واقفة و انت نازل نفق بيحطوا علامة إكس فوق الحارة دي عشان تحاول تاخد حارة تانية

4 – تهييس تحت المطر

الأسبوع اللي فات الرياض كانت بتغرق بس الحمد لله ربنا ستر
طبعا الطريق متعطل و واقفين بقالنا أكتر من ساعة و نص مش بنتحرك
ساعتها كان نفسي في بتون بتاع سيف درافت , أسيف و أقفل العربية و أنزل أفك ضهري شوية و بعدين لما أرجع أبقى أعمل كونـتـيـنـيو
برضه ابقوا فكروني أضيف البتون ده في الحلم , البتون ده ببقى محتاجه قوي و أنا بحلم لما حد يقوم شادد كابل الباور بتاع الحلم و أنا في أعماق أحلاها نومة
طبعا الحد ده عارف نفسه كويس

ربنا يستر

5- تهييس في البيت

انتوا طبعا عارفين البهدلة اللي بتحصل لما تنقل لمكان جديد, شقة جديدة و عفش جديد و ترتيب و تنظيم و تنضيف و الكلام ده
أول ما العمال نزلوا العفش ومشيوا بصيت كده على الشقة و الكركبة اللي فيها و قلت في عقل بالي
لسه هرتب و أنضف ؟ مافيش تيمبليت جاهزة ؟
طب فين فايل السي اس اس بتاع الشقة يا جدعان و أنا أظبطها

6 – تهييس بني آدم

للأسف بعض الأشخاص اللي ربنا ابتلاني بيهم في حياتي , بما اني مابحبش أدعي على حد أو أعمل مشكلة مع حد , أحب أهديلهم السي اس اس كلاس دي



.IhateYou{

width:0;

height:0;

cursor:pointer;

z-index:-10;

padding:0;

margin:1000000 cm;

}

الناس اللي جايب آخري منهم بقي مالهمش عندي غير الكلاس دي



.ُEkhfa { display:none !important; }

جوجل : بفلوسي يا … انترنت

Ahmed Moharram — Wed, 28 Apr 2010 11:11:33 +0000

جوجل .. سلطان الانترنت و خاقان التكنولوجيا .. للأسف

جوجل ..

بلا شك عملاق الانترنت غصب عني و عن أي حد غرآآن في خيرات جوجل اللي محاوطاك في كل حته أولاين

من كام يوم كان عندي مشكلة في النت و جوجل مش بيفتح , و الله مابقتش عارف أعمل ايه

كان في مشكلة عند الآي إس بي النت كله شغال تمام ماعدا جوجل و مع ذلك حاسس اني أوفلاين

المهم

كنت بدعبس عن آخر أخبار جوجل كده لقيتهم اشتروا شركة اسمها لاب بيكسي , شركة متخصصة في عمل الجادجيتس , الحاجات اللي بتطلع في آي جوجل مثلا و جادجيتس الآي فون و أندرويد و الفايس بوك كمان

بغض النظر عن ان الشركة دي اسرائيلية بنت تيييييييت و اللي عاملينها تلات عيال صهاينة مالهمش لازمة و احنا برضه لسه قاعدين نتفرج على فكرة

بس ده مش موضوعنا

اتصدمت أصلا لما عرفت ان الشركة دي هي اللي عامله تقريبا معظم الآي جوجل لأني كنت فاكر ان جوجل هي اللي عاملاه

الأهم

رحت فاتح واحد جوجل سيرش و سألت جوجل عن جوجل أكويزيشن Google Aquisition

وقع في ايدي مقال على ويكيبيديا عن تاريخ كل الشوبنج اللي جوجل عملته أونلاين

لحد امبارج جوجل كانت اشترت 67 شركة , أيووووون 67 شركة و خدتهم تحت جناحها بموظفينهم بأفكارهم بمنتجاتهم

برضه عشان محدش يفهمني غلط, أنا مش بهاجم سياسة جوجل بالعكس احنا في عصر الاحتراف زي ما الأهلي و ريال مدريد بيعملوا

أنا بس اندهشت من حجم الأكويزيشنز دي و كمان لما تشوف كمية الفلوس الخيالية اللي اتدفعت فيها هتندهش أكتر

أحب أسيبكم مع المقال الظريف على الويكيبيديا , افعص هنا

و فيه شاب تاني عامل جراف ظريف أوي برضه موضح كل الحاجات اللي جوجل اشترتها

اخبط هنا

برضوا البتاع ده خلاني أسرح بخيالي كده و أفكر لو فعلا عندي شركة عاملة حاجة فيها انوفايشن عالي لدرجة تخللي جوجل تيجي تشتريني

هل هابيع فعلا؟

هل لو كنت أنا في مكان مكتوب , هل كنت هبيع لياهوو ؟

سؤال صعب و ما أظنش اني بقدراتي أو خبراتي الحالية أقدر أجاوب عليه

بس مين عارف

لو بطلنا نحلم نموت

مفتاح الياريس و لابتوب شحاته

Ahmed Moharram — Tue, 20 Apr 2010 06:22:25 +0000

يمكن العنوان غريب بس الموضوع نفسه و القصة يمكن تكون أغرب

القصة تبدأ بشاب محترم اسمه محمد شحاته , ديزاينر و ديفيلوبر أكثر من رائع. الراجل و هو ماشي بعربيته أذن للعشاء قاللك اركن و أنزل أصلي في الجامع

ركن عربيته قدام الجامع لمده لاتزيد عن 15 دقيقة هي مدة الصلاة خرج لقى شباك العربية مكسور

أنا عاوز أقف هنا لحظة قبل ما أكمل و أسأل سؤال

يا تري في النص ثانية اللي بعد ما شاف إزاز العربية متكسر يا تري كام مليون فكرة مرت في عقله في النص ثانية دي

المهم

لسوء حظ الراجل الطيب و قدر الله و ما شاء فعل انه كان نسي يحط اللابتوب بتاعه في شنطة العربية زي ما بيعمل كل مرة

كده الأمور وضحت

أحد المفسدين في الأرض معدي من جمب الجامع بدل ما يدخل يصلي لقى عربية و فيها لابتوب , استغل ان فيه دوشة عشان في قاعة أفراح و مناسبات و راح مدغدغ الإزاز و شال اللابتوب و طار

مشكلة صديقي محمد شحاته الحقيقية مش اللابتوب نفسه و لكن المشكلة في شغل 10 سنين راحوا في الهوا

يمكن ما يحسش بخطورة الموضوع ده الا الناس اللي حصلهم فعلا و ضاع منهم شغل سنين و أنا منهم

واحد يقوللي طب ما هو أكيد كان واخد باك أب , أقوله ماهو علشان كل الحاجات الحلوة (المصائب) لا تأتي فرادى , الباك أب درايف بتاعه كان جوه الشنطة ساعتها بقدر الله

ممكن تشوفوا القصة كاملة هنا ,محمد بيحكي القصه في البلوج بتاعه

طبعا مش عاوز أقول أد ايه اللي حصل ده منرفزني بس قدر الله و ما شاء فعل

قد يكون الموضوع لحد هنا لبعض الناس مفيش فيه جديد , سرقة و بتحصل كل يوم و في كل مكان

الغريب و اللي خلاني أكتب الموضوع ده اللي حصل معايا بعدها بيومين

أنا راجع من برة بالليل مرهق جدا و عاوز أنــــــــــــــــــام , ركنت العربية قصاد البيت و طلعت نمت زي القتيل

تاني يوم الصبح بدور على مفتاح الياريس عشان أنزل أروح الشغل , مفيش حاجه , قلبت الشقة من أولها لآخرها برضه مفيش حاجه

و لأني متعود على كده و ذاكرتي الحديدية ياما عملت معايا مواقف قلت أكيد أنا حطيته في مكان عبقري كالعادة و مش هعرف ألاقيه دلوقتي

خدت تاكسي و رحت الشغل و رجعت قلت أدور بقى براحتي

برضه مفيش حاجه , كده بقى ابتديت أقلق

نزلت بصيت جوه العربية يمكن أكون قفلت عليه و أنا نايم برضه لأ

استعوضت ربنا و قلت كده يبقى أكيد راح

بالليل خدت بعضي و رحت للشركة اللي أنا مأجر منهم العربية أجيب مفتاح تاني , على ما جابولي المفتاح كان الوقت متأخر خدت المفتاح و روحت البيت نمت من غير ما أبص على العربية

نزلت تاني يوم الصبح رايح الشغل دورت العربية و مشيت عادي جدا لحد ما عديت على صديقي عمرو بدوي كالعادة عشان نروح الشغل سوا

عمرو باشا كان واقف مستنيني و بدل ما يفتح الباب و يركب لقيته رايح عند الكبوت , الواد ده نايم و لا ايه هيركب في الرادياتير !!

طبعا أنا مصدقتش نفسي لما لقيت عمرو بيطلع المفتاح اللي كان ضايع من الشبكة اللي في وش العربية

سبحان الله

يبقى كده الأمور وضحت

يوم ما روحت بالليل وقع مني المفتاح جمب العربية و واحد ابن حلال لقي المفتاح و حطوا في الشبكة من قدام

يعني العربية فضلت واقفة في الشارع بمفتاحها يوم بليلة و الحمد لله ماحدش خدها و راح يعمل شوبنج مثلا ,ما هي كده بقت عربية سبيل

طبعا أنا لو بإيدي أعمل جايزة نوفل للأمانة و أديها للراجل الطيب ده اللي أنا معرفش هوه مين , جزاه الله كل خير

طيب بعد ما سردت القصتين دول , هل القصتين دول ليهم أي مغزى؟

أنا شفت بعض الناس اقترحت على شحاته انه يسيب مصر و يهج بعد اللي حصل له ده و ده في رأيي رأى متطرف جدا و غير موضوعي إطلاقا

عشان رغم اللي حصل معايا مثلا أعرف ناس كتير قوي هنا في الرياض عربياتهم اتقلبت عيانا بيانا جهارا نهارا

و برغم اللي حصل مع محمد شحاته في مصر أعرف و ناس كتير قوي تعرف قصص للشهامة و الأمانة و الجدعنة مالية مصر من أولها لآخرها

الخلاصة ان مصر مش هي الجحيم اللي الناس متصوراه و عايزه تهرب منه لجنة الدول العربية أو كندا أو أستراليا

كل مكان هتلاقي فيه ابتلاءات و الابتلاءات أشكال و ألوان و أنواع

و ربنا يصبرنا

و يا رب يرجعلك اللابتوب يا شحاته

آمين